‘ખેતર કે ઘરની આસપાસ દીપડો દેખાય તો તેને ભગાડવા માટે જોર જોરથી ગીતો ગાવ’

Share
  •  
  •  
  •  
  •  
  •  
  •  
  •  
  •  

સુરતઃ હાલમાં જ અમરેલી જિલ્લામાં એક માનવભક્ષી દીપડાને ઠાર મારવામાં આવ્યો. અવાર નવાર દીપડા જંગલમાંથી ગ્રામિણ વિસ્તારોમાં પહોંચી જતા હોવાના મામલા સામે આવ્યા છે. ત્યારે સુરત જિલ્લામાં વાઈલ્ડ લાઈફ એક્સપર્ટે દીપડાને માનવોથી દૂર રાખવા માટે નવો ઉપાય જણાવ્યો છે, જે મુજબ જો તમે શેરડીના ખેતરમાં હોય અને આસપાસ દીપડો આવવાની શક્યતા હોય તો જોર જોરથી ગીતો ગાવ અથવા સિટી મારો.

સુરતના ડેપ્યુટી વન સંરક્ષક પુનિત નાયરે જણાવ્યું, દીપડા ગાવાનો કે સીટી મારવાના અવાજથી ટેવાયેલા નથી હોતા. આથી આ અવાજથી તેમને માલુમ પડે છે કે આસપાસમાં કોઈ માનવ છે. સાઈઝમાં નાના હોવાના કારણે દીપડા પોતાનાથી મોટી સાઈઝના માનવો પર હુમલો નથી કરતા. આથી ગીતો ગાવા કે સિટી મારવાની ટેકનિક હિંસક પ્રાણીને દૂર રાખવા માટે ઉપયોગી સાબિત થઈ શકે છે.

હાલના સમયમાં દીપડા અને માનવો વચ્ચેના તકરાર વધી રહી છે. અમરેલી અને સુરત જિલ્લામાં ઘણીવાર દીપડાએ માનવો પર હુમલો કર્યાની ઘટના સામી આવી છે. આ પ્રકારની ઘટનાઓ રોકવા માટે વન વિભાગ ‘લેપર્ડ એમ્બેસેડર્સ’ પ્રોગ્રામ સાથે આવ્યું છે. આ એમ્બેસેડર્સ ગામ લોકોને હિંસક પશુ સાથે સંઘર્ષ કર્યા વિના કેવી રીતે સેફ રહેવું તે શીખવશે. સુરતના હજીરા અને ઓલપાડના ઈન્ડસ્ટ્રીઅલ વિસ્તારમાં પણ દીપડાની મૂવમેન્ટ શરૂ થઈ ગઈ છે.

નાયરે કહ્યું, સુરત જિલ્લામાં માંડવી અને માંગરોળ તાલુકામાં દીપડાની મૂવમેન્ટ માનવ વસાહત નજીક સૌથી વધારે હોવાનું અમે નોંધ્યું છે. આથી વન વિભાગે આ તાલુકાઓમાં ‘લેપર્ડ એમ્બેસેડર પ્રોગ્રામ’ શરૂ કર્યો છે. શેરડીના પાકની લણણીની સીઝન નજીક હોવાથી માનવો અને પ્રાણી વચ્ચે સંઘર્ષ થવાના ચાન્સ વધી શકે છે. કારણ કે દીપડા ઘણીવાર શેરડીના ખેતરમાં પોતાના બચ્ચાને જન્મ આપતા હોય છે. એવામાં આ ટેકનિકથી ખેડૂતો દીપડાને ડરાવીને ભગાડી શકે છે.


Share
  •  
  •  
  •  
  •  
  •  
  •  
  •  
  •